شعب مصر
يا شعبي العظيم
يارمز الصمود
يا رمز الأمل
ياأهبل يابن لأهبل
أنا ضحكت عليك
بداية التدوينة : حبت الجيش المصري الجييييييييييش وراح الجيش وعرفت المجلس العسكري وحبيت المجلس العسكري المجلسسسس وراح المجلس العسكري
كلمات هبلة واردت علي في كتابة النوت اللي بجد مش عارف أبدأ فيها منين
بصو يا جماعة اعذروني لأن النوت دي هتكون ركيكة شوية
أولا المجلس العسكري حبيب الكل والرفيق العزيز للثورة المصرية حامي الحمى صاحب المواقف النبيلة والمية الساقعة في عز الحر أبن الرزلة اللي بينكد على شباب الثورة في ثورتهم ويفض أعتصامتهم
بدا المجلس العسكري في وضع خطة أستراتيجية بحتكة بجد وبدا في تنفيذها علشان يطقش(زي البيض كدة ) الشعب المصري العظيم في بعض
على فكرة هوة عملها كذا مرة وفشل من ايام الثورة زي الأستفتاء وموضوع الدستور أولا وبلطجية التحرير وظباط 8 أبريل والوقيعة بين الشعب والجيش وهكذا أنما المرة دي بصراحة ارفعله القبعة نسبة فشله في الخطة دي بسيطة جدا إن لم تكن منعدمة
لنه لأنه بيعتمد فيها على الشعب المصري العظيم
طب أزاي ؟؟؟؟؟؟
هقولك أزاي في واحد طلع بصباعه ووقف للشعب المصري العظيم في قمة عنجهيته وتهديداته المستمرة بصباعه اللواء محسن الفنجري البرنس رفع صباعه للشعب المصري العظيم في تحذير منه للشعب المصري العظيم بأي حاجة هيعملوها تاني هتبقى كوخة هيتعامله معاها بكل حزم وهيطلقوا الشعب المصري العظيم على الشعب المصري العظيم المهم في خطابه رمى كلمة أنا عرفت وساخة هذه الكلمة وهوة بيقولها كأنه كان بيشتمني وهوة بيقول (إعداد وثيقة مبادئ "حكيمة" لاختيار الجمعية التأسيسية لإعداد دستور جديد للبلاد) أو كما أطلق عليها مواد فوق دستورية
طيب يعني هوة هيعمل مبادئ دستورية عمرها ما هتتغير يعني لو جالنا رئيس مازنجر مش هيعرف يغيرها
طيب مين يا معلم اللي هيشارك في الموضوع دا أختار مجموعة اغلبها من الليبراليين مع أقصاء تام لأي تيار أسلامي للمشاركة في هذا الأمر قشطة فراحوا الجماعة الاسلاميين سواء كانت جماعة أسلامية أخوان سلفيين بالنزول للحفاظ على الهوية الأسلامية يوم 29 يوليو
سواء كنت معاهم أو لأ ولكن مظنش أننا عملنا الثورة علشان كدة !!!!
المهم الشعب المصيري العظيم نازل يوم 29 تمام جدا ومين تاني يا معلم
الأسلاميين نازلين كمان !!! فتخيل بقى الشعب المصري العظيم نازل في حاجة تانية خالص من اللي نازل فيها برضه الشعب المصري العظيم فتخيل بقى لما الشعب المصري العظيم ينزل ضدد الشعب المصري العظيم
حرب اهلية وش يا معلم وبدون مبالغة
أتمنى أن دا ميحصلش اللي زاد وغطى بقى أن حركة شباب 6 أبريل أصبحت الحركة المحظورة والمجلس العسكري بيوصي الشعب المصري العظيم أنه يعمل معاهم الواجب وياعيني هيرجوا مرة تانية يطبعوا المنشورات بالبالوظة والشغل اللي تحت السلم
المهم أتمنى من الشعب المصري العظيم يبطل هبل ويرجع مرة تانية لصوابه أيد واحدة
سواء كان الشعب المصري العظيم الاولاني أو الشعب المصري العظيم التاني كلهم شعب مصر خلينا أيد واحدة ضد أي حد يحب يخرب علينا ثورتنا
والله الموفق
تحياتي
ليست هناك تعليقات:
إرسال تعليق