يوم 9-9 نظرا لظروف المطالب التي نُطالب بها المجلس أردت أن أرى مقترحات لليوم
هادفة تساعد في نجاحه بسلام ويمر بشكل رائع ونساعد في عملية الضغط على
المجلس العسكري بشكل سلمي وناخد مطالبنا وكل واحد يروح على بيته بسلام ولو
في مطالب تانية يوم الجمعة أكيد مش هيتحذف من الأسبوع ولا ميدان التحرير
هيطير هنرجع تاني والمجلس عارف كدة وعلى العموم اناتصفحت تلك المقترحات لهذا اليوم وما أعجبني منها :
أولا أقتراح الصفحة المزورة لأئتلاف شباب الثورة وبينصحوا فيها بالاتي :
1- هات هدوم كتير علشان شكلنا هنبات في القسم يا عباس
2- هات قبقابك معاك ويكون بيدبدب في الأرض علشان نرهب العدو
3- وظبط حالك علشان تركب دبابات موديل 73 جيش القاهرة يعني أتعلم على 128 مش هتفرق كتير على غيارات الدبابة
وأيضا أسعدني أقتراحات السيد عمر عفيفي في التجهيزات يعني كل واحد يجيب معاه
1- نظارة بحر
2- كاوتشات لزوم الأتموسفير
3- عصاية بمسامير
4- والكلبشات البلاستيك للأسري
5- وقزازة مية
5- ووسائل دفاع مختلفة
وعجبني موضوع الأسرى دا
سبحان الله أحنا بنتظاهر بشكل سلمي يا جدعان وبنضغط على المجلس بشكل متحضر
الناس دي نسيت تماما أن الناس لما تشوفنا بالهمجية دي هتفتكرنا اننا عايزين فعلا نعمل حرب على الجيش وهتكون كدة ليهم أرض خصبة علشان يظبطوا لينا شوية تصريحات من اللي هية بتاعة خونة وعايزين يخبروا البلد ومش بعيد يطلع علينا بلطجية بجد واحنا مش عارفين هيكون عددنا كام
يا شباب الكلام دا كله كلام فارغ أحنا عايزين نضغط على المجلس العسكري اللي ماسك أمور البلاد بشكل سلمي ومتحضر ومن غير ما نكره الناس فينا ولا حتى نفقد تعاطفهم يعني أحنا يا جماعة لو أتمسكنا كدة بربطة المعلم بتهمة البلطجة ودي ممكن تحصل لو سمعنا الكلام اللي بيقلوه الناس دي
بغض النظر عن نية كل شخص بيكتب الكلام دا أنما أحنا مش هنشوه صورة الثورة لا بقبقاب ولا حتى بعصاية فيها مسامير
أحنا عايزين يوم 9-9 دا يكون يوم نظيف خالي من أي أشتبكات عايزين نوري لكل الناس أننا متحضرين الثورة دي علمتنا أن السلمي هوة اللي بينفع
عايزينها سلمية سلمية علشان نعرف نطلب حقنا وناخده كمان
تحياتي
@HaysamElMasrY
ليست هناك تعليقات:
إرسال تعليق